Overrasking

For nokre dagar sidan var vi innom Husfliden, der eg skulle kjøpe garn til nytt strikketøy. På veg gjennom butikken kunne eg naturligvis ikkje la vere å stoppe for å beundre fine koppar og fat frå Marimekko. Eg stod og heldt på koppen på biletet, men skrapa saman nok viljestyrke til å gå frå den. Eg manglar trass alt eigentleg ikkje koppar å drikke av, og enkelte her heime har vel nevnt at eg kanskje skulle hatt "koppevaksine"?! Men jammen var den fin, koppen! 

Dagen etter skulle eg rydde på plass ein vase på øvste hylle heime i kjøkkenskapet, og heldt nesten på å sleppe vasen i golvet. I skapet stod nemleg koppen eg hadde latt vere å kjøpe!! Snille husbonden hadde lurt seg innom Husfliden etter at vi gjekk der frå og kjøpte den som presang til meg. For ei finfin overrasking!

Tusen takk, kjære husbond! :)

Haust!

Eg har landa heime i godstolen etter å ha tilbragt søndag ettermiddag ute ved havet. Der ute i fjøresteinane og inne blant trea i skogen kjende eg første streif av hausten i år. Det lukta rått og godt av mold, mose og lyng, og lufta var skarpare enn tidlegare i sommar sjølv om sola kom og helsa på. Eg synest det er godt. Sjølv om dei andre årstidene er fine på sine måtar, er hausten min favoritt! 

I skogen plukka eg med meg ein bukett lyng som får pynte bordet vårt når vi startar på ei ny veke.

Håper veka di vert god!

Kvardag - og så helg...

Kvardagen er i gong att etter sommaren. Tempoet er skrudd opp nokre hakk, så i dag kjennest det godt at det er fredag. Eit godt påskot for å bake gulrotkake... 

God helg!

Prikkekopp

I dag har eg og eldsteguten vore på svinsetur til Ålesund. Vi gjekk trappene til Fjellstua, snuste inn sjølufta på Molja og åt pizza. Fint å ha med seg berre eitt barn på tur ein gong iblant! 

Eg var ein tur innom Husfliden òg, og der kjøpte eg meg ein prikkete Marimekkokopp eg har hatt lyst på ei god stund. Den er så FIN! Og etter ei testkøyring i ettermiddag, kan eg konstantere at den er like god å halde i og drikke av som den er fin å sjå på! 

No angrar eg berre på at eg ikkje kjøpte to... ;)

Laurdag med haustkjensle

I går var vi på dagstur til Geiranger og kjende på sommaren.

I dag vakna eg og fekk haustkjensle. Regn og småhustrigt hus gjer at ullsokkar, tende lys og kaffi er heilt på sin plass. 

God laurdag til deg!