søndag, oktober 31, 2010

Over på vintertid

Siste dag i oktober. Søndag med regn, blåst, haustlauv, tende lys. Ingen halloween her, her er det behageleg fritt for grøss og gru. :) Berre kos, nypoppa popcorn, bøker og teiknesaker. 
Håper du òg har hatt ein fin søndag!

fredag, oktober 29, 2010

Ettermiddag ved kjøkkenbordet



Eg førebur vinteren med ullgarn og strikkepinnar i hand. Festing av trådar er ikkje det kjekkaste eg veit, men det må også til. Ei runde eller to i vaskemaskina no, så er eit nytt par varme, mjuke tovavottar klare.

tysdag, oktober 26, 2010


Ein koseleg ettermiddag på 1-2-3

Når gradestokken ein oktoberettermiddagen viser berre eit par usle varmegrader, sludd og regn piskar forbi og utsikta frå kjøkkenvindauget ser slik ut...

...då plasserer ein den bærbare PC'en på kjøkkenbenken, åpnar bloggen til Kardemomme for freistande krydderkakeoppskrift, finn fram ingrediensar frå skapet og set Minsten til å bake! Nåja, ikkje heilt på eiga hand kanskje, men han er i ferd med å bli ein kløppar på å røre i deiga - og å slikke bollen, sjølvsagt.

Etter ei stund brer lifleg pepperkakeduft seg i huset (ja, for kaka luktar akkurat som pepperkaker medan den steiker!), og så er det berre å gle seg til ettermiddagskaffien. 

Det må leggast til at kaka var både saftig og god og utruleg lett å lage, denne kjem nok til å bli ein gjengangar. Las også i kommentarane hos Kardemomme at det går an å bytte ut krydderet med 6 ss O'boy og få sjokoladekake. Må prøvast! 
Takk for inspirasjon og oppskrift, Kardemomme! :)

måndag, oktober 25, 2010


Rask og enkel fornying

Eg er svært glad i det flotte skapet vi har arva og som vi har bestekoppane våre i, men det vert litt "grått og fargelaust" der inne bak glasdørene ettersom det er lite dagslys som når dit inn, og også fordi fargane på koppane er så lyse i fargen.

Eg har tenkt at eg kanskje kunne setje tapet eller stoff på bakveggen inne i desse hyllene, men har ikkje funne noko som eg syntest passa. Då vi var i København var vi ein tur innom denne søte butikken (blogg her), og der kjøpte eg eit par rullar innpakningspapir frå House Doctor. Ein dag eg sat heime i sofaen att, slo det meg at eit av desse papira ville vere perfekt bakgrunn for koppane våre!

Baksida av papiret er til og med rutete, så det var enkelt å klippe ut passeleg store papirbitar. På baksida festa eg gluedots frå Panduro, slik at det er lett å plukke det vekk att dersom eg vert lei. Klipp, klipp, scmokk, scmokk, så var det på plass. Det tok meg omtrent eit kvarter. *fornøgd*

Og så MÅ eg berre vise dykk: dette må vel neeeesten kunne kallast kaffikunst??? Hehe...det er sanneleg ikkje så lett å lage ein perfekt latte synest eg, men eg øver og øver, og innimellom vert det ikkje så verst. :)

Ha ei god veke!

fredag, oktober 22, 2010

Bustebartepinn

Ein litt molefonken Bustebartepinn som vart til i hagen vår i går. I dag er han borte vekk under tjukke lag med snø, stakkar! 

God helg! :)

torsdag, oktober 21, 2010

Pastellmorgon




I dag tidleg var det så fint ute at eg berre måtte hive frå meg hårfønaren eg var igong med å starte opp for heller å veive litt rundt med kameraet. Snøen gir slikt eit fint lys! Og no lavar det ned igjen - huttetu!!!

onsdag, oktober 20, 2010

Vinter!







Så fekk vi helse på vinteren igjen! Dei første snøfillene kom i gårkveld, og ungane var sjølvsagt i ekstase. Då dei to største var gått til skulen i dag tidleg, var Minsten meir enn klar for å gå ut og kjenne på det kalde, kvite han såg utfor vindauga. Dermed var det berre å kle på seg og setje igong med snøballkasting og leik med bøtte og spade. Vi fekk lagt ut mat til fuglane og berga inn nokre blomsterpotter òg før vi tusla oss inn att. Der venta ei ferdigheva rundstykkedeig som vart skyssa inn i omnen, slik at vi kunne kose oss med nysteikte rundstykke til formiddagsmaten.

Det er ikkje alle sider ved vinteren eg er like begeistra for, men jammen er det koseleg med eit slikt første snøfall, rikeleg med ved i vedkorga, fyr i omnen, tende lys og tjukkeraggar på beina! Og så eit strikketøy mellom hendene. Perfekt!

måndag, oktober 18, 2010

Heldiggrisen

Denne koppen har eg ønska meg ei god stund, eg syntest berre ikkje eg kunne kjøpe fleire koppar med det første. Det hadde ei veninne plukka opp, og i går kom ho med den som forsinka gebursdagspresang til meg!
Eg er ein heldiggris! :)

torsdag, oktober 14, 2010

Kledeleg




Eg kasta blikket ut gjennom kjøkkenvindauget då eg stod og laga mat i dag, og måtte igjen konstantere for meg sjølv at eg er svært fornøgd med leveggen og gjerdet vi har fått laga. Det vart så mykje lunare stemning rundt inngangspartiet då dette kom på plass! Og så likar eg så godt den svartbrune fargen! Etterkvart skal huset også malast svartbrunt. Enn så lenge er det nøttebrunt, som er fargen dei første huseigarane gav det. Forsåvidt ein grei farge, men eg trur huset vert enda flottare i ein mørkare nyanse. Fargen står i alle fall finfint til delikate pastellrosa roser i hagen om sommaren, og jammen er den flott mot den gullgule bjørka til naboen no om hausten òg! Kledeleg!

onsdag, oktober 13, 2010


Ferm living


Ferm living har blitt leverandør hos hviit (nettbutikk som forøvrig har mykje fint!), og i bloggen hviit går det no ein ønskelistekonkurranse, der vinnaren får oppfylt sine ønske. Eg ønsker meg ein kopp og ein pip-pip! :)
Det er...


haust
grått
mørkt

... fram med lysslyngene!!!

Men pass godt på dei! Ei av lysslyngene våre var nær å ta fyr i vinter. Heldigvis kjende eg røyklukta og fekk lempa den ut i snøen før det vart brann. Skummelt! Likevel klarer eg ikkje å la være å henge opp ny lenke - dei er jo så fine! Særleg på ein grå dag, slik som i dag. :)

måndag, oktober 11, 2010

I fyr og flamme




Mmm...det er fint i skogen!

God morgon!


Eg startar den nye veka med ny og rar-fin lampe på kjøkkenet. Det var så mørkt i hjørnet der espressomaskina står, og eg hadde lyst på ein enkel lampe som ikkje kom i vegen for sakene på hylla bak. Valget falt på NUD; rett og slett ei kvit tekstilledning med porselenssokkel. Enkelt og greit. Og altså litt rar-fint. Men eg må få skaffa meg ei pære som ikkje blendar oss aldeles. Det einaste eg hadde i hus var ei 40 watts pære, og solbriller er eit must dersom lampen skal vere påskrudd, hehe. Vi får sjå om 25 watt vert betre. 

Ha ei god veke, folkens!
PS! Eg fekk eit par spørsmål om utelampa vår. Den er kjøpt på nett for eit par år sidan, og eg kan ikkje for mitt bare liv hugse kva for ein nettbutikk det var! Eg lovar å kome tilbake med nærare informasjon dersom eg skulle kome på det seinare.

fredag, oktober 08, 2010

Straumstans...




Då eg kom heim frå spaserturen min tidlegare i kveld, syntest eg det var svært så mørkt i huset. Dei andre kunne informere om at straumen hadde vore borte i ti minutt, og eg kryssa fingrane for at straumstansen skulle vare ei lita stund til. Eg er svært takknemleg for at vi har elektrisitet, men jammen er det koseleg når vi vert nøydd til å finne fram fyrstikker og stearinlys for i det heile tatt å kunne finne fram i huset! Og ungane var heilt enige! Vi kosa oss med gelé og vaniljesaus i skinet frå massevis av tende lys. Prima! Og så var det godt at straumen kom tilbake etter ei stund, slik at eg fekk laga ein kopp kaffi. ;)

torsdag, oktober 07, 2010


Ein oktoberettermiddag i hagen

I forgårs tok eg med meg kameraet ut medan ungane leika i hagen. Véret har vore snodig i det siste, det har nesten vore sommar, med opp mot 20 grader og fønvind. Slik var det denne ettermiddagen også, og eit tjukt skydekke gjorde at det ikkje vart skikkeleg lyst ute, sjølv midt på dag.

Haustfargane har gjort seg meir og meir gjeldande, og det er nydeleg å kunne nyte dei i opphaldsvér!

Hostaen vert skikkeleg fargesprakande om hausten...

...og det blir også årets nyplana tre i hagen vår; hjertetreet. Enno har det eindel grøne blad, og eg fyl spent med på utviklinga etterkvart som fleire og fleire av dei fint forma blada vert gule og oransje.

Buksbomen er imidlertid fin og grøn, kjekt å ha litt vintergrønt også rundt huset.

Pyntekålen er nok eit fargestrålande innslag rundt inngangspartiet. Eg blir meir og meir glad i pyntekål!

Bordet på uteplassen får stå ute ei stund til. Sjølv om det nok vert lite brukt framover, gjer det ein god jobb som dekorativt innslag der ute.

Japp, det var ein liten rundtur ute hos oss. Véret er bra i dag òg, det (etter eit forrykande uvér i natt...!), så vi må skunde oss ut og nyte det.

God torsdag!

måndag, oktober 04, 2010


Haustferie
 

Haustferien er igong. Det er grått ute og regn i lufta, og vi luffar rundt innandørs og tar det med ro.


Eg måtte ta eit bilete til av København-lysestakane mine, på litt nærare hald denne gongen. På litt avstand er det kanskje englestaken som skiller seg mest ut, men når eg kjem tett på telyshaldaren i keramikk er eg SÅ fornøgd med meg sjølv for at eg kjøpte den. Den er kvit inni, og utanpå er den lys, lys blåturkis. Og så har den fine, små hol i stripemønster, som slepp lyset så delikat ut når den er i bruk. Like it!


Oppe på peisen har eg hatt fattigmannssølv ståande nokså lenge, og det var på tide med litt forandring. Eit par av stakane fekk plass på ei hylle bak spisebordet (sjå det øverste biletet), medan resten er på ferie i eit skap. Så plukka eg inn to store lykter frå vinterhagen og let desse få hovudrolla i eit nytt stilleben. Kjekt med forandring! 

Alt går imidlertid i litt sakte fart om dagen, for eg har ein rygg som ikkje fungerer heilt slik den skal. Men den er under behandling og opptrening, og eg håper det går seg til utover hausten og vinteren. Den vonde ryggen gjorde at 365-prosjektet mitt dessverre gjekk i stå, så veit de det, dersom de lurer på kvifor det ikkje kom nye oppdateringar på den fronten.

Til slutt må eg berre sende dykk vidare til ein fantastisk skjønn blogg, der ei mor tar bilete av draumane til den lille babyen sin. Til å bli i godt humør av! Bloggen finn du her.