søndag, januar 31, 2010

Ingeniørkunst


Hehe, store ord, ja, men eg må berre vise dykk festeanordninga for lampen vi har ved sofaen. Lampen er eit loppemarkedfunn som dessverre mangla tingesten som skal brukast for å feste lampen til eit bord eller liknande.


Løysinga vart å bore eit hol i ei gamal tønne eg hadde ståande (takk til husbonden for hjelp med boring!), og vips - så var problemet løyst. At eg fekk ein ekstra plass å leggje frå meg bøker ved sofaen var heller ikkje dumt. Ingeniørkunst på sitt beste! ;)

laurdag, januar 30, 2010

I dvale

Det snør og det snør. Snøfresarane i nabolaget durar og går, og i gangen vår er det konstant våte vintersko, vottar og dressar på tørk. Under det tunge snødekket ute ligg naturen og søv. Det er rart å tenke på at dei frosne rosekvistane utfor veggen om nokre månader bøyer seg mot jorda under vekta av store, duftande roser!


Då er duren av snøfresarar erstatta av humlesurr, og eg skal ta med meg rosesaksa og korga mi og plukke rosene inn i store bukettar! Men enno får dei sove ei stund til.

fredag, januar 29, 2010

Ein fredag i slutten av januar

- inne:

- ute:

God helg!

torsdag, januar 28, 2010

Sånn i all beskjedenheit...


I dag såg eg badet vårt er ein av finalistane i baderomskonkurransen på Norske Interiørblogger!

Sånn i all beskjedenheit: Eg vert veldig glad dersom du har lyst å legge att ei stemme på badet vårt (nr. 7) her. Tusen takk! :)

onsdag, januar 27, 2010

Æsj!


No er det andre gong eg rekkjer opp att eit langt stykke på jakka eg var tenkt å strikke til meg sjølv, og eg trur eg anser prosjektet for å vere avslutta. Det er ikkje alltid ting vert slik ein tenkte, gitt. Med det same eg er i gong med oppattrekkjinga drar eg pinnane ut av eit par andre UFO'ar og let dei gå tilbake til trådnøsteform att dei òg.  Etterpå skal eg plukke fram bambuspinnane og strikke lilla vottar etter blånissemønster. Dei skal varme små fingrar inne eit par regnvottar. Det kjennest godt å starte på nytt!

tysdag, januar 26, 2010

Brød



I dag bakar eg. Det går litt i rykk og napp med brødbaksten min, så i perioder går det i kjøpebrød hos oss. Men du og du, så godt det er med nysteikte brødskalkar med smør og brunost når eg og Kenwooden har jobba litt på kjøkkenet!

Eg såg forresten ein aldeles nydeleg liten brødbakstidé i bloggen til Hønepøne i går kveld, brød i ein kaffikopp! :)

No må eg ile tilbake til kjøkkenet og ta brøda ut av omnen. God tysdag!

måndag, januar 25, 2010

Vakrare for kvar dag




Det er ikkje alle tulipanar som imponerer meg kvalitetsmessig. Nokre tørkar sørgmodig saman og må kastast etter nokre få dagar, andre held seg lenge og vert faktisk vakrare for kvar dag. Det siste er tilfelle med buketten eg kjøpte for ei veke sidan. Visst var dei flotte då dei var nye, med tette knoppar og nystrokne blad, men eg synest dei har noko så utruleg delikat over seg no når dei svever ut over bordet med litt for lange stilkar og med kronblad som vert meir og meir gjennomsiktige. Eg synest eg fekk mykje blomsterglede for kronene mine!

søndag, januar 24, 2010

Glitter


Etter høgtidene vert som regel litt av pynten verande att - ei god stund! Det kan vere eit par julekuler av fattigmannssølv liggande i eit fat, påskeegg på ein kvist (som faktisk hang heilt fram til advent!!), eit lite hjarte på ein dørknott, eller som her; ein prinsesseengel Vesla hadde laga til oss i julepresang. Kathrin snakkar om å "strø glitter på kvardagen", og den lille engelen der oppe på hylla glitrar i alle fall over min kvardag. Tusen takk, Vesla! :)

laurdag, januar 23, 2010

Helg!


Så var det helg - igjen! ♥

Ha ein super laurdag!

fredag, januar 22, 2010

Neimen helledussen!!!



I dag har vi fint besøk her. Eg oppdaga plutseleg at Nøtteliten sjølv hadde klatra opp i det store treet som står rett utfor husveggen vår, og då måtte han sjølvsagt forevigast gjennom kameralinsa! Vi bor tett ved skogen, men likevel er det ikkje ofte vi ser ekorn, så dette var stas. Sist eg sjekka sat han enno oppe i treet og såg ut som han hadde seg ei lita formiddagspause. :)


Eg har også pause, og eg brukar ho til å nøste opp garn som forhåpentlegvis skal verte ei lun strikkajakke til meg sjølv. Håper eg rekk å svinte innom nokre av bloggane dykkar også, før det er full fart her igjen. :)

God helg!

torsdag, januar 21, 2010

Er det ikkje herleg...



...når blomsteravdelinga i matbutikken bugnar av friske tulipanar? Tjue pastellfarga eksemplar fekk bli med meg heim frå Prix i forgårs og er no fordelt utover stove og kjøkken. Dei spelar på lag med sollyset som smett inn gjennom vindauga og fortel at det går mot lysare dagar!

tysdag, januar 19, 2010

Varme føter


I kuldeperioden vi hadde no i byrjinga av januar, fraus eg på føtene. Ullsokkar klarte ikkje å halde tærne mine varme, og eg bestemte meg for å kjøpe tøflene eg har sikla på ei god stund; tova ulltøfler frå Glerups. I helga kom dei i posten, og dei er SÅ gode! På ein lapp som hang på dei, stod det: "ADVARSEL! Fare for avhengighet!" Heilt rett! Desse kjem eg til å bu i til dei ramlar frå kvarandre! ;) No er det plussgrader ute, men dei som har greie på det, seier at det skal verte kaldare igjen. Eg skal i alle fall ikkje fryse på føtene!

måndag, januar 18, 2010

Bad!


Det pågår ei baderomsutfordring inne på Norske interiørblogger om dagen, og då kan det passe bra å ta ein sving innom badet vårt for å sjå korleis det vart der inne til slutt. Vi reiv ut alt innhald og starta på nytt i fjor sommar, og eg laga eit innlegg om det her då vi var nesten ferdige. Vi er faktisk enno ikkje heilt i mål, det manglar det eit par knaggar, og så jaktar eg på eit lite skap til å henge på veggen. Vi får sjå om det dukkar opp eit på loppemarked etterkvart, kanskje.


Vi er i alle fall svært fornøgde med dette rommet, det er rett og slett himmelvid forskjell frå det som var her før!


Jepp, det var altså vårt bad! Meir om baderomsutfordringa på Norske interiørblogger finn du her.

Ha ei god veke! :)

laurdag, januar 16, 2010

Skal tru...

...om eg skal bake rundstykker til søndagsfrukosten i morgon? Desse er i alle fall frykteleg greie å lage!

5 dl lunka vatn, 1-2 ss olje, 1 ts salt, 1 ss sukker, 50 g tørrgjær, ein god slump havregryn og nok mjøl til ei passeleg klissete deig rørast raskt ihop i bollen og får heve ein halvtimes tid. Så klattar eg deiga på bakepapirkledde plater med ei skei, strør over solsikkefrø og lar dei heve nokre minutt til før eg steiker dei på 225 grader til dei ser passe gyldne ut.

Mmmm...

torsdag, januar 14, 2010

Jiha!


Det vart regnbogetunika, gitt! Passa gjorde den òg! Eg strikka som sagt utan mønster og var veeeldig spent på om det heile kom til å bli vellukka, men det trur eg jammen vi kan seie det vart! Den er altså strikka i Kaunigarn, og eg hadde denne kjolen i tankane då eg strikka Vesla sin. Min versjon vart utan "blondekant" nederst, eg strikka berre rett slik at det vart rullekant. Ellers var det nyttig at eg har strikka nokre gensrar med raglan- og rundfelling før, slik at eg kunne improvisere fellinga litt etter augemål.

Dette var eit skikkeleg koseprosjekt, det var berre så utruleg spanande å sjå fargeskifta vekse fram etterkvart som eg strikka! Og Vesla er fornøgd ho òg, og det er det aller viktigaste! :)

onsdag, januar 13, 2010

I dag...


...nytta eg formiddagsblunden til Minsten til å rydde og vaske på arbeidsrommet. Der var støvete, rotete og guffent, og eg kjende ikkje minste fnugg av inspirasjon ved å kome inn der. No er der strøkent og grønsåpeduftande (så lenge det varer…), og eg håper og trur at lysta til å sy skal kome dalande neste gong eg svingar innom! :)

søndag, januar 10, 2010

Regnbogeull


Eg har fortalt om fascinasjonen min for regnbogefargar tidlegare her i bloggen min, og i dag vert det eit nytt regnbogeinnlegg. For når eg kom over dette fantastiske garnet, som skiftar langsomt i regbogen sine fargar, då måtte eg berre ha det! No har eg begynt å strikke ein tunika til Vesla. Eg hadde ikkje oppskrift og prøver meg berre fram, så får vi sjå om eg er heldig og får det til, eller om eg bommar heilt. Garnet er i alle fall kjempemoro å strikke av, og er eit skikkeleg fargekick i januar! Det heiter kauni og kan kjøpast her.

fredag, januar 08, 2010

Hutre...


Eg må innrømme at ein stakkars sunnmøring synest det er litt vel kaldt om dagen. I dag tidleg var det så kaldt i stova at det var reint utriveleg, sjølv om varmepumpa og elektriske omnar jobbar på spreng. Heldigvis har vi godt med ved og ein super liten Jøtul-omn, så no er det i ferd med å kome seg.


Lag på lag med mjuk ull er i alle fall heilt nødvendig! Og eg har ingeting imot å tulle meg inn i eit ullpledd og bla i ei av bøkene eg fekk til jul. Denne var eg så heldig å få av "Eplanissen". Ungane lurte fælt på kven det kunne vere, hehe. Eg måtte til slutt tilstå at det var eg sjølv som hadde kjøpt den for inntekter frå Eplabutikken min. ;)

God fredag!

torsdag, januar 07, 2010

Tidleg


Syn og høyrsel.

onsdag, januar 06, 2010

Vinteren på sitt aller, aller beste...


I går var ein utruleg fin dag! Himmelen var knallblå frå morgon til kveld, og landskapet gnistrande kvitt. Eg knipsa nokre bilete seint på ettermiddagen, og dei flotte istappane fekk sjølvsagt vere med no òg!


Inne var det lunt og koseleg. Nydeleg å krølle seg saman i sofaen og sjå den blå timen passere. Slik skal vinteren vere!

tysdag, januar 05, 2010

Krystallklar morgon



Kulda og snøen den siste tida har produsert store, flotte istappar på huset vårt. Farleg, javisst, men vakkert òg. Akkurat desse heng i alle fall ein stad der ingen går med fare for å få dei i hovudet. I vindauget speglar lysa på juletreet seg - enn så lenge. Eg er i ferd med å plukke ned julepynten. Kunne gjerne tenkt meg å ha juletreet fram til helga, men det dryss så forferdeleg av det at no orkar eg ikkje meir. Det blir tomt etter det, men eg får vende blikket ut vindaget og sjå på pynten som vinteren har laga til oss i staden. Det er slett inga dårleg erstatning!

måndag, januar 04, 2010

Frå kjøkkenet


Kvar gong eg skal opne kjøleskapsdøra er eg på kunstutstilling. :)

søndag, januar 03, 2010

Snart kvardag...



I morgon er det altså slutt på ein god juleferie. Overgangen frå ferie til kvardag kjem alltid litt brått på, og eg klør meg i hovudet og lurer på korleis to veker kan gå så ufatteleg fort! Eg skal i alle fall passe på å nyte dei siste timane før vi må skru opp att tempoet. Og så gjeld det å prøve å ta julefreden med seg inn i kvardagen sjølv om den kan kjennest hektisk innimellom.



I kjølvatnet av stjernebrettingsfeberen eg fekk like før jul, har eg hatt lyst til å prøve meg på meir papirbretting. Hos Liselotte kom eg over desse fine papirblomstrane, og i dag gjorde eg eit forsøk på å lage ein slik. Det var jammen både enkelt og morosamt, og resultatet er slett ikkje verst, synest eg! :) Denne første blomsten laga eg av ei side i eit interiørblad, og eg brukte glue dots til liminga, slik at eg slapp å vente på lim som skulle tørke.

No skal eg skunde meg å strikke litt før Minsten vaknar! :)

fredag, januar 01, 2010

Eit nytt år gjennom linsa



Nytt år, nye mogelegheiter! No har det gått nokre veker sidan eg avslutta 365-prosjektet mitt. Det har vore godt med ei pause, men eg har kjent at eg saknar det lille "sparket bak" som gjer at eg må gjere ein liten ekstra innsats i forhold til det å ta bilete. Det er fort gjort å verte litt lat, same kor kjekt eg synest det er å fotografere! ;)



Dermed startar eg no opp eit nytt år med (minst!) eit foto kvar dag. No, som sist, reknar eg med at det ikkje alltid er like lett å få lasta opp og lagt ut bileta kvar dag, så det tek eg litt alt ettersom det passar.
Eg er klar for eit flott foto-år! Utstyret er også oppgradert. Eg har nytt (heimelaga) overtrekk til nakkereima, ny kameraveske er undervegs i posten, og eit har fått eit ekstra objektiv. *jippi*




Og bileta i den nye 365-serien vert lagt her.

Ynskjer dykk alle eit strålande nytt år! :)