Lett tilgjengeleg

Det ligg oftast ein stabel med diverse utstyr for avkobling på stovebordet vårt. For tida eit strikketøy og litt lesestoff. Kathrin lurte på kva for ei bok det var som låg på bordet i går, og det var denne. Ei nydeleg bok å drøyme seg vekk i! Strikketøyet mitt er også innan rekkjevidde. Hugsar de at eg starta friskt på ein Vossegenser for eit par månader sidan? Vossegenseren er no ein saga blott. Det vart rett og slett for mykje mønster å konsentrere seg om med ein eittåring i huset, og eg rekte arbeidet opp att og begynte på nytt med Fanamønster i staden. Det går ikkje så fort med strikkinga no heller, men eg vert i alle fall ikkje stadig frustrert over å ha strikka feil, og så er det glimrande TV-strikk (passar bra når eg skal sjå “Drømmedesign”)! Vossemønsteret får eg spare til eg får tid og stunder til å telje maskar og studere mønsterrapportar. :)

Til småsakene

Eg har tutla og sydd litt fleire pungar/småvesker i det siste, og dei er klare for salg her. No kan det forresten vere lurt å begynne å tenke på julegåver dersom ein vil vere ferdig i god tid før jul, kanskje finn du ein handlaga presang eller to i Buda mi? Velkommen innom! :)

Ser du dei?

Pepparkakene på bordet, altså? Ja, eg har tjuvsmaka på dei. Fleire gonger til og med. Berre fordi dei er så gode, og fordi det er dei heimelaga pepperkakene som smakar jul for meg. Så kjøpepepperkaker er lov! I oktober.

Rykande fersk

Eg broderte nokre små figurar for ei stund sidan, og i går bestemte eg meg for å bruke eit av dei og lage ei nålepute. Eg har jo den fine nåleputa eg fekk av Kathrin, men har tenkt på at eg skulle hatt eit par eksemplar til, slik at eg ikkje treng å flytte med meg nålene når eg bevegar meg mellom symaskin, arbeidsbord og strykebrett (…og golvet). Dermed vart denne til. Den var så kjekk å sy, og så er det så kjekt å få brukt opp små stoffrestar! Det er ikkje utenkeleg at eg lagar nokre til for salg i Buda mi. Følg med, følg med… :)

Ny dag, ny veke

Morgonlyset er grått i dag, med felt av gull mellom skyene. Vi har starta dagen med rolege pianotonar gjennom høgtalarane og leik med Duplo og stableklossar. Vi er klare for ei ny veke.

PS! "Isrosene" på vindaget er ikkje isroser, men mønster i ruta pga punktering. Vanlegvis ein smule irriterande, men i morgonlyset er det eigentleg nokså vakkert. :)

Takkar og bukkar

Tusen takk for tilbakemeldingane ang det nye formatet! Fleire av dykk lurer på korleis ein går fram for å trikse med dette, og då sender eg dykk rett over hit! :)

På hylla

Eit av dei andre funna frå loppemarkedet eg var på i går, er den blå kanna som har fått plass på kjøkkenhylla vår. Fin, ikkje sant?

Ellers er eg igang med å teste anna format på bloggen min. Er ikkje sikker på om eg er fornøgd, eller om det berre er litt uvant enno. Eg synest i alle fall det er kjekt å kunne vise bilete i litt større format enn før. Kan eg spørje kva de synest?

Ny favoritt i stova

Endeleg kom eg meg på loppemarked igjen! Det var lenge sidan sist, og forventningane var ikkje så høge, etter at det har vore langt mellom dei store skattane på dei siste loppemarkeda eg har vore på. Men tenke seg til; i dag fann eg eit par ting eg har hatt på loppishugselista mi (...bak øyret) i årevis! Ein av tinga var globus. Dei globusane eg har sett tidlegare har enten vore for nye, nokre hakk for shabby - eller for dyre. Denne var perfekt. Passe gamal, passe størrelse, passe pris (50 kroner, takk!), og perfekte fargar. No kan vi studere kor slektningane som er på jordomsegling eigentleg er komne, og om vi verkeleg kjem til Kina dersom vi grev eit hol rett ned i jorda. Veldig praktisk. Eg er ein heldiggris! ;)

Av og til...

...krev kvardagen for mykje av meg til at eg orkar å vere kreativ. I alle fall til å vere kreativ lengre stunder om gongen.


Men å få utløp for kreativitet er viktig for meg. Det gir meg så mykje, og det skal faktisk heller ikkje så mykje til bestandig. Å sitje stille nokre minutt på arbeidsrommet med kaffien min medan Minsten søv...

...smårydde litt i sakene mine...

...drøyme opp nye prosjekt i hovudet mitt...

...og sy dei to siste saumane på ei ny pysjamasbukse; - så har eg fått påfyll på energitanken og er klar til ny dyst! :)

Og pysjebuksa skal eg snart teste. Ha ei god natt!

Fredag, laurdag, søndag

Fredag: Produksjon av merkelappar til tinga eg lagar.

Laurdag: Opplading heime etterfulgt av nødvendig runde på handlesenter.

Søndag: Pusling rundt i huset og spasertur i oktobersol. Tid til å beundre og planlegge bruk av "laurdagsgodtet" eg kjøpte i går. (Band frå Aspegren.)

Kva har du brukt helga til?

Bruksgjenstandar som lyfter humøret

Dei fjonge sakene eg brukar når eg vaskar opp høyrer absolutt til i kategorien "ting som lyfter humøret"!

Eg set særleg pris på denne muggen, som er arvegods. Muggen er litt stygg i botnen, men passar perfekt som tilhaldsstad for oppvaskkostane våre. Og ja - eg likar å ha fleire kostar i bruk, berre fordi dei ser fine ut der dei står! Eg passar på å hamstre når dei har kostar i fine fargar på butikken! :)

Og så synest eg det er ganske smart å ha ein boks å gøyme oppvaskmiddelet i. Eg brukar forresten Neutral oppvaskmiddel - fordi flaska er kvit, og ikkje gul og grøn! ;) Den gule og grøne bur inne i oppvaskbenken og vert berre brukt når svært skitne gryter og liknande skal skrubbast.

Oppvasken er tatt for i dag, no står stovegolvet for tur. Ha ein fin torsdagskveld! :)

På arbeidsbordet


På arbeidsbordet mitt ligg det ein fin liten haug med ørsmå lavendelduftande posar som skal sendast ut som små ekstragåver når eg sender ut varer frå Buda mi. Eg har hatt god hjelp av dei to største ungane med stempling og fylling av posane. Kjekt med lagarbeid! :)


No skin sola på snødekte fjelltoppar utfor vindauget her eg sit, og Vesla må nok skifte vérkortet sitt i vindauget når ho kjem frå skulen! Det vert nemleg ein knallfin haustdag!

Nyt dagen!

Laurdag

Laurdag: Ein blank formiddag utan planer.

Eg tok dei to eldste ungane med på utflukt som inkluderte snusing i brukthandelen (...utan nevneverdige funn...) og litt frisk luft. No står baking av brownies på programmet. Laurdag er ein fin dag!

Pipp!






Ein gjeng glade fuglar har gjort inntog i Buda mi! Velkommen innom du òg! :)

Fargekick junior


Når mor får sove litt frampå ein morgon i haustferien...

...vaknar ho til fint sorterte interiørblad i gangen. Enkelte i den yngre garde i huset har plukka opp at vi har eit fargesorteringstema gåande om dagen, og har kosa seg med å organisere bunken med Elle Interiør. Kan ikkje seie anna enn at det varmar morshjartet! ;)

Lys i mørket


Når ein ser på dei to siste bileta i 365-serien min, kan ein nesten tru at det har vorte jul her i heimen, men det har det altså ikkje. Det er berre eg som i desperat mangel på lys prøver å skape nokre lyspunkt innandørs i det temmeleg grå og dunkle véret vi har denne hausten. Nok ei lysslynge i stova vår hjelper ein bitteliten tanke, i alle fall.

Dei raude epla i skåla på kjøkkenet vårt kjem frå ei stor kasse som landa på trappa i går. Nokre av dei vart trylla om til ei lun eplekake i går kveld. Eg brukte denne oppskrifta, og den er verkeleg supergod! Tusen takk for epla, mamma! :)

Ha ein fin haustdag der du er!

Enda ein regnboge...


Syko kajsa la inn ein kommentar på forrige innlegg der ho fortalde at ho sorterer ungane sine bøker etter fargar, og at ungane synest det er kjekt å setje bøkene på plass i dette systemet. Og det måtte vi sjølvsagt prøve...


Enn så lenge ser det i alle fall bra ut! :)

Fargekick


Eg likar å ha det lyst og " reint" rundt meg her heime, gjerne med små pastellfarga fargeklattar innimellom. Men når eg ser "regnbogar" i ulike former, får eg sug i magen. Eg hugsar  frå eg var lita at ei nabojente hadde eit målarskrin som sikkert hadde 100 fargar i seg. Å, så misunneleg eg var!  Og det å sortere fargeblyantar, perler, knappar eller andre ting sirleg etter farge har  alltid fascinert meg.  Denne veka har eg hatt ein sorteringsjobb av dette slaget. Eg var lei av å hale og dra i trådflokar kvar gong eg skulle brodere,  og kjøpte meg difor eit skrin med plastkort til å sortere broderitråden i.  At eg ikkje har gjort dette før! No er det enkelt å finne den tråden eg leitar etter, og lett å ha oversikt over kva eg må kjøpe meir av. Og sjølve sorteringsarbeidet var så kjekt at eg nesten var lei meg då eg var ferdig, hehe!
 

Minsten har også fått ein regnboge å leike seg med. Denne fekk han i eittårspresang frå oss, og eg veit ikkje kven som er mest  begeistra for den; eg eller han. Eller storesyskena. 
 

Den er i alle fall kjempekjekk å leike med, og når den ikkje er i bruk, er den fin i årstidsutstillinga vår.


Til slutt må eg ta med eit "regnbogeprosjekt" til. I fjor sommar sydde eg desse fargeblyantetuia til ungane, etter inspirasjon frå den første boka til Soulemama. Eg må innrømme at dei ikkje har vorte alt for mykje brukt, men dei er kjekke å ha i bilen når ein skal på ferie, til dømes.
 

Kanskje eg skulle sy meg eit sjølv, slik at eg alltid kan ha med min eigen regnboge på tur?

Pst!





Eg har lagt inn to nye handlenett i Buda mi!