I dag har vi feira Vesla vår som fyller 5 år i overmorgon. Det er mykje arbeid å lage selskap, men veldig kjekt å ha besøk av små og store gjestar!
Vi feira i to omgonger i dag, så eg synest eg har ete kaker heile dagen. *mett* :)
To trøytte ungar ligg no fornøgde under dynene sine, og eg har kollapsa med beina opp i sofaen og pc'en på fanget. No vil eg ta ei runde ut i bloggane dykkar før eg tar tidleg kveld.
Det kan hende de hugsar at eg kjøpte meg sykkelkorg i fjor, i vente på at eg skulle få meg råd til ny sykkel? Sykkelkorga har vore trygt plassert på ein stolrygg i vinterhagen heilt til no i sommar, då 5000 blanke norske for ein sykkel har vore litt i meste laget når det er andre ting som burde prioriterast. For ein drøy månad sidan kom eg på at eg skulle snuse litt rundt på finn.no etter brukte syklar, og ikkje mange dagar seinare dukka denne skjønnheita opp. DBS, 7 gir, brukt 3 gonger, halv pris av nypris - eg var ikkje sein om å slå til! Nokre dagar seinare kunne eg spasere ut av posten med gliset mitt, kry som ein hane! :)
Trultepusen vår brukte eit halvt sekund på å bestemme seg for at å posere i ei sykkelkorg ikkje er tingen. Sjekk den fornærma mina! *fnis*
Dagens rose-dose; Loise Odier ønskjer velkommen ved inngangsdøra vår...
...medan New Dawn for alvor er i ferd med å kome i sving for sommaren.
Ikkje det at vi er nøydd å skaffe så mykje nytt til babyen vår som skal kome i haust. Med ein gut og ei jente frå før, har vi forsåvidt det meste som trengst. Likevel er det kjekt å lage litt nytt i alle fall. Eit nytt og nuppefritt vognteppe er ikkje så dumt å ha, og no om dagen kosar eg meg med å hekle bestemorruter i mørk brun, lyseblå og offwhite babyull. Vi veit ikkje om det er ei jente eller ein gut som sparkar i magen min, men på eit vognteppe fungerer denne fargekombinasjonen fint til begge kjønn, synest eg. Dessutan vil det passe fint til den mørkeblå vogna vår. Å, som eg gler meg til å trille baby igjen! :)
Eg tyt stadig om rosene mine. Dei som ikkje likar rosene får knipe att augene. ;) Sidan vi flytta inn i huset vårt for snart 4 1/2 år sidan, har eg planta nokre rosebusker. 'Louise Odier', 'New Dawn', ei gamal kvit prestegardsrose som eg har "arva" og 'Hurdalsrosa'. I fjor haust smelte vi til og kjøpte 20 eksemplar av 'Maiden's Blush', som skal verte ein vidunderleg, duftande rosehekk mot hovudvegen når den berre får vekse seg til. Alle plantene i hekken har overlevd vinteren og har massevis av knoppar. Foreløpig er den berre 30-40 cm høg, men den ser ut til å ha sett inn turboen, så eg håper den snart vil skjerme hagen for innsyn frå den kanten.
Medan eg ventar på at ferskingane skal vekse seg til, nyt eg dei godt vaksne eksemplara og frydar meg over å kunne klippe roser i eigen hage. Det er kvardagsluksus!
Nei, no har det regna nok, synest eg. Eg trur hagen er rikeleg vatna. Eg skulle gjerne ha planta rosene eg kjøpte på tilbod i går, men det freistar ikkje å spa i søkkblaut jord, så eg ventar på litt betre vér. I mellomtida er det trivelegare å drikke kaffi og ete laurdagsgodt i sofakroken.
Kanskje eg skulle samle mot til å ta ei kveldsrunde ut i hagen for å fornye rosene på stovebordet?
I fleire år har eg vore på jakt etter ny sofa til stova vår. Eg var ikkje fornøgd med fargen på sofaen vi kjøpte då vi var nygifte, og har styra og stella med diverse laken- og teppeanordningar for å skjule elendigheita. Det har forsåvidt fungert greit, men det er litt slitsomt å måtte "reie opp" sofaen kvar gong nokon har brukt den! Ein Ektorp frå Ikea har stått på ønskelista, men det har aldri vorte anledning til å få ein slik i hus, då næraste Ikea er temmeleg langt unna.
Til sofaen høyrde også ein lenestol, som eg også fekk. :)
Og når eg hadde fått så fint nytt møblement, måtte eg sy eit par nye puter som stod i stil. Eg sydde to puter i lin, med blonder og gamle bilete som eg strauk på kvitt linstoff.
Bileta vart henta frå eit gamalt familiealbum som eg var så heldig å få av ei anna veninne i fjor sommar. Dette er med andre ord sannsynlegvis eit fotografi av ein eller annan slektning av denne venninna. Tusen takk, L!
Avsluttar dagens innlegg med roser. Fortsatt duftar dei i stova vår, og enno er vi berre tidleg i rosesesongen! *hurra!* Desse eksemplara, som flyt i ei skål med vatn, er Louise Odier og New Dawn.
I vår vart eg tante til ei nydeleg lita jente. For eit par veker sidan vart ho døypt, og som ein del av dåpspresangen strikka eg denne jakka. Mønsteret er frå Elizabeth Zimmermann si bok "Knitter's Almanac". Eg har sett fleire versjonar av den rundt omkring på ravelry og i ulike bloggar, eg strikka den i finull.
Ellers vil eg takke for koselege kommentarar på forrige innlegg, det er kjekt å vere tilbake! :)
Det har gått nokre månader sidan eg takka for meg her på bloggen. Inspirasjonen til å blogge var rett og slett sporlaust vekk. Det var kanskje ikkje så merkeleg, med tanke på at eg var i første fase av mitt svangerskap nummer 3. Eg skal bli trebarnsmor og har termin i september! :) Energien er framleis ikkje på topp, men på tross av det kjenner eg ei viss blogg-kløe kome snikande. Så eg tek sjansen på eit adri så lite comeback.
I første omgang må eg vise dykk eit lite prosjekt eg har starta på. Tenkte eg skulle sy opp nokre babysmekker, dei kan vere gode å ha når vi ein vakker dag kjem til sikle-stadiet. Dei to første er sydd i mintgrønt bomullsstoff frå Stoff og Stil, med deilig, mjuk bomullsflanell på baksida. Dei skal få trykknappar,eg må eg berre sjå å få skaffa meg trykknappar til å banke fast først. Rosa er forresten 'Louise Odier' som duftar herleg på stovebordet i augneblinken.
